PAHAYAG HINGGIL SA PAGKAWALA NI LOZADA
Bilang Chairman ng Committee on Human Rights, kinukundena ko ang pagdukot o ang pwersahang pagkawala ni Jun Lozada. Ito ay maliwanag na labag sa kanyang karapatang pantao. Ang pwersahang pagdukot at pagkawala ni Lozada habang siya ay lumalabas sa eroplano ay kahalintulad ng pag-uwi ng ating bayani na si Senador Ninoy Aquino noong Agosto 21, 1983, Sa katunayan, ipagdiriwang natin ang ika-25 taong anibersaryo ng pagkabayani ni NINOY ngayong 2008.
Si NINOY ay umuwi upang sabihin ang katotohanan. Si Lozada ay umuwi upang sabihin ang katotohanan sa Senado. Sana ay hindi mangyari kay Lozada ang nangyari kay Ninoy. Nababahala at nangangamba ako sa kanyang kaligtasan. Ipagdasal natin na walang masamang mangyari kay Lozada pati na din sa kanyang pamilya.
